На 6-ти декември (среда) во Младинскиот културен центар (МКД), по трет пат ќе се одржи Саем за здруженија на граѓани за волонтерство и активно граѓанство на Град Скопје.
Работниот дел на саемот ќе започне во 11 часот со форумите за вмрежување на присутните здруженија/фондации, а во 13 часот ќе биде официјално отворен за посетители.
Оваа година НВО саемот ќе се одржи под мотото „Активно граѓанство = подобро општество“.
На третиот НВО саем е предвидено свои презентации да имаат голем број здруженија на граѓани и фондации кои се регистрирани на територија на Град Скопје, но и организации/фондации кои не се регистрирани во Скопје, но дел од своите активности ги спроведуваат за бенефит на граѓаните на Скопје.
И оваа година учесниците за подобро вмрежување ќе имаат можност да ги презентираат своите активности пред јавноста и другите здруженија, да разменат искуства и да дадат сугестии за понатамошна соработка, а ќе бидат организирани и три тематски трибини.
Саемот за здруженија на граѓани за волонтерство и активно граѓанство на Град Скопје се организира како дел од активностите за одбележување на 5-ти декември, Меѓународниот ден на волонтерството.
Овој саем е во организација на здружението на граѓани „Волонтерски центар Скопје”, а финансиски е поддржан од Град Скопје.