Градоначалникот на Скопје Коце Трајановски денеска изврши увид во градежните работи на првата фаза од проектот за проширување на булеварот „Партизански одреди“ кон црквата „Свети Петар и Павле“ во Ѓорче Петров.
Деновиве започна поставувањето на првиот слој асфалтирање на краците на новата кружна крстосница кај Порта Влае, којашто е формирана на поранешната крстосница помеѓу булеварите „Партизански одреди” и „Ѓорче Петров” и улицата „Ацо Шопов“ кај Порта Влае.
Трајановски е задоволен со динамиката на изградбата на овој кружен тек и рече дека со неговата изградба значително ќе се намали сообраќајниот метеж и ќе се зголеми општата безбедност во сообраќајот.
– Очекувам денеска да заврши асфалтирањето на првиот слој на оваа важна сообраќајница, додека за 10 до 15 дена, доколку дозволат временските услови, ќе започне и поставувањето на вториот слој. По завршувањето со нанесување на вториот слој, во зависност од временските прилики, ќе биде поставен и третиот-финален слој на асфалт, а доколку временските услови не дозволат, тоа ќе се изврши напролет. Во секој случај, сообраќајот ќе се одвива на асфалтирана подлога, со што граѓаните нема повеќе да возат по тампон и кал и нема да ги валкаат своите возила, изјави Трајановски.
Новиот кружен тек е со дијаметар од 40 метри, односно коловоз од 9 метри со две сообраќајни ленти, со заштитна патека од 1,5 метри и простор каде ќе биде поставено средишно зеленило.
Неговата изградба е дел од проектот за проширување на булеварот „Партизански одреди” до кружниот тек кај црквата „Свети Петар и Павле”. Проектот се реализира во две фази – во оваа фаза е предвидена изградба на кружниот тек и проширување на булеварот „Партизански одреди“ до влезот во автобазата на ЈСП.
Втората фаза ќе следува по експропријација на земјиштето и ќе го поврзе булеварот „Партизански одреди“ со кружниот тек кај црквата „Свети Петар и Павле“.
На проширување на булеварот „Партизански одреди“ кон црквата „Свети Петар и Павле“ во Ѓорче Петров, со изградба на кружен тек кај Порта Влае работат екипите на „Бауер БГ“, а за реализацијата на првата фаза од овој проект се одвоени околу 50 милиони денари.