Проектот Скопје 2014 е мега проект, којшто тешко би можел да го реализира, која било власт во која било земја. Тоа што опозицијата го напаѓа неаргументирано и е само за да си ја оправда својата неспособност кога таа била на власт.
Ова го истакна вечерва на мини-митинг во населбата Буњаковец градоначалникот на Центар и кандидат за уште еден мандат на коалицијата „За подобра Македонија“ предводена од ВМРО-ДПМНЕ, Владимир Тодоровиќ.
Тој осврнувајќи се на својата програма со која ја бара довербата за претстојните избори подвлече дека проектот „Скопје 2014“ треба да продолжи.
– Приказната за Центар мора да продолжи бидејќи Центар заслужува да го задржи епитетот европски, посочи Тодоровиќ.
Ја побара поддршката од присутните порачувајќи дека треба да гласаат за оние кои работат и кои оставија неповторливи дела, подвлекувајќи дека четири години тој и неговиот тим работеа на подобрување на животот и функционалноста на сите населби во општината. Потсети и на дел од реализираните проекти во општина Центар.