Министерот за здравство Никола Тодоров и градоначалникот на Аеродром, Ивица Коневски викендов го поминуваат во Неа Флогита, Грција.
И тоа не би била никаква вест, со оглед дека Тодоров и Коневски редовно се во Грција секоја година, но не и доколку медиумите што ги контролира власта и таа самата не ги жигосуваше како “предавници“ сите што одат на одмор кај “јужниот сосед“.
Уште е во сеќавање едно лето пред неколку години, кога неколку функционери на ВМРО-ДПМНЕ јавно повикаа да не се оди во Грција на одмор и да не се оставаат парите таму. Секој што одеше на одмор во Грција од политичарите од опозицијата беше “спружуван“ на насловните страни како “предавник, додека тие што ги спружуваа, тајно, понекогаш и два-три пати во годината, си одеа во Грција.
-Најистакнатите лица на опозицијата, кои се најгласни во критиките за економските реформи и зафати во земјава, потоа за режимот кој ги осиромашува, како и за сите зафати во државата за кои велат дека ја оддалечуваат Република Македонија од евроинтегративниот процес, немаат проблем летото да го минат кај јужниот сосед, главната пречка за приемот во НАТО и за почетокот на преговорите за полноправно членство во ЕУ, напиша минатата година “Република“ а беше пренесен од сите провлaдини гласила.
Според ваквите написи, логично се поставува прашањето-дали истите медиуми сега ќе ги прашаат сите функционери на ВМРО-ДПМНЕ дали имаат проблем летото и викендите да ги поминуваат во Грција, главната пречка за прием на Македонија во ЕУ и НАТО?
Минатата година, Грција регистрирала 2,7 милиони македонски посетители, за периодот од јануари до септември. Македонија е на врвот на листата земји рангирани по бројноста на туристи во Грција, пред Германија, Велика Британија, Бугарија, Франција и Италија. Очигледно сонцето го топи “патриотизмот“ во летните денови.