Едно лице почина од четворицата повредени во тешката сообраќајна несреќа која се случи утринава околу 9 часот на регионалниот пат Штип – Кочани, меѓу штипските села Долни Балвин и Крупиште. Во сообраќајката учествувале две патнички моторни возила, „матис“ и „пикап“.
Според првичните информации од штипската болница, едно лице од повредените во несреќата починало.
Командирот на Противпожарната единица Кире Патраклиски изјави дека и пожарната интервенирала при вадењето на патниците од автомобилите.
Оваа сообраќајна несреќа се случи на еден од најлошите свиоци на регионалниот пат Штип – Кочани.
Полицијата врши увид на местото настанот по што ќе се утврди кои се причините за тешката сообраќајна несреќа. Сообраќајот е во прекин на регионалниот пат Штип – Кочани, со што се создаде долга колона од тешки товарни возила.