Лидерот на ДПА, Мендух Тачи по средбата со американскиот амбасадор Пол Волерс најави дека е можно повторно да се обнови соработката со СДСМ за заеднички настап на локалните избори.
Тачи како прв чекор за да се реализира ова рече дека очекува иницијатива од СДСМ зашто од таму бил прекршен првичниот договор што тој го постигнал со Бранко Црвенковски. Прашањето за соработката и односите на СДСМ и ДПА според Тачи му го поставил американскиот амбасадор.
„Јас му реков дека тие го прекршија договорот. Дали можеме да се вратиме на стариот договор? Би требало сигналот да стигне од другата страна, дека ќе се почитува првичниот договор, таму каде мнозинството се Македонци, ДПА ќе гласа за кандидатите на СДСМ и на коалицијата и обратно, таму каде мнозинство се Албанци, македонската опозиција ќе гласа за ДПА.
– Потребно ни е рационално однесување. Нема зошто да се инаетиме едни со други. Секој има свој интерес а ова е рационален пристап кон еден можен договор, технички договор, изјави претседателот на ДПА, Мендух Тачи.
