Пратеникот од ВМРО-ДПМНЕ, Димитар Стевананџија, од собраниската говорница му се обрати на пратеникот Павле Богоевски на кого му кажа дека интерпелацијата е поради него, како што рече, да му проработела совеста.
„Ако има искрени и реални пратеници, нема да има влада вечерва“, рече Стевананџија.
Тој прочита цитат на Богоевски, каде што кажал: „Најдете доказ, ако Заев заговара двојазичност, јас ќе се повлечам од функцијата“. Стевананџија му рече на Богоевски да се казни самиот себеси и да се повлече од функцијата.
„Очекуваме Павле Богоевски да поднесе оставка, да ѝ се извини на јавноста и да проработи совеста во него за да биде вистинскиот борец за човекови права. Вака сè е фарса“, рече Стевананџија.
Богоевски на ова одговори дека е лага и манипулација и побара од Стевананџија да ја прочита целата изјава и дека тоа се однесувало на тврдењата на ВМРО-ДПМНЕ дека Заев во говор во Швајцарија заговарал двојазичност. Пратеникот Богоевски тврди дека тогаш побарал да му се даде доказ дека Заев го зборувал тоа во Швајцарија и дека ако е вистина, ќе се повлече од предизборната кампања.
„Таа изјава е дадена во изборна кампања кога вие на големо зборувавте дека сегашниот премиер бил на некои посети и зборувал дека ќе воведе двојазичност со сигурност. Јас барав линк и цитат за да се докаже тоа. Ова сега не е двојазичност на начинот на кој вие зборувате. Ова е сега легализирање на правата на секој човек за да комуницира со органите на државата“, рече Богоевски.