Стејт департментот преку пишано соопштение повторно повикува на брзо формирање влада во Република Македонија со цел да се стави крај на политичкта криза.
– Заедно со нашите НАТО сојузници и партнери во ЕУ, САД внимателно го следат процесот на формирање влада во Македонија, што уследи по парламентарните избори на 11 декември, 2016 година. САД ги повикуваат лидерите во Македонија, да формираат нова влада, без натамошно доцнење, и сето тоа да биде во согласност со Уставот и аспирациите на земјата за членство во Европската унија и НАТО, се наведува во соопштението на Стејт департментот.
Се нагласува дека формирањето на нова влада, посветена на владеење на правото и спроведувањето на потребните реформи, ќе помогне да се стави крај на политичката криза која сериозно го забави демократскиот и економски развој на Македонија, како и нејзината евро-атлантска интеграција.
– Соединетите Американски Држави ги повикуваат сите партии, интересите на Македонија и нејзините граѓани да ги стават над се, да имаат конструктивна соработка и целосно да ги имплементираат сите свои определби според договорот од Пржино, се нагласува во соопштението од Канцеларијата на вршителот на должност портпарол на Стејт департментот, Марк Тонер.