Пазарот на недвижности во Македонија е стабилен. Бројот на трансакции за продажба и закуп расте, а цената на становите е стабилна и таа се движи во рамки на маргините од плус минус 3.000 денари. Нема понуда на огромен број станови што би довело до драстичен пад на цената на квадратот.
Ова го истакна директорот на Агенцијата за катастар на недвижности на Република Македонија Славче Трпески, кој денеска на прес-конференција ги презентираше едногодишните податоци од воспоставениот Регистар на цени и закупи.
Според него, ваквите податоци покажуваат дека во моментов има во некои општини благ пад на цените на становите, но во други има благ пораст на цените.
Извештајот, како што рече, покажува дека пад на цената има во скопската општина Центар каде што во вториот квартал од 2015 година просечната цена за метар квадратен изнесувала 62.643 денари, додека во првиот квартал од годинава изнесува 57.502 денари. Во Ѓорче Петров, пак, е забележан благ пораст од 39.040 денари во вториот квартал од 2015 година на 42.281 денар во првиот кваратал од 2016 година. Во општина Аеродром најниската цена во овој период е забележана во март 2015 година, по што следи стабилизирање на нивото од претходните квартали од 51.595 денари.
За другите градови пораст е забележан на цените на становите во Битола, а пад во Тетово.
Според евиденцијата на Катастарот, заклучно со првиот квартал од 2016 година на пазарот на недвижности има 2.564 новоизградени непродадени станови, а во изградба според листовите за предбележќување на градба има 5.107 станови. Може да се заклучи, истакна Трпески, дека понудата на станови на пазарот на недвижности ја надминува побарувачката на новоизградени станови.
Евиденцијата на Катастарот покажува дека има благ пораст на трансакциите и кај закупнините при што во вториот квартал од 2015 година има регистрирано 1.636 закупи, а во првиот квартал од годинава 2.771 закупна недвижности. Просечните цени покажуваат дека највисока цената на закуп е во Центар која просечно изнесува 240 денари за квадрат, потоа следуваат Карпош со 219, Кисела Вода 196, Аеродром 179, Гази Баба 127, Ѓорче Петров 121 и Чаир 98 денари.
Закупнината во Битола се движи од 192 денари за квадрат, Охрид 168, Куманово 125, Гевгелија и Струмица 115, Велес 103…
Просечната цена за закуп на деловниот простор е 539 денари за квадрат во Центар, Карпош 376, Гази Баба 307, Ѓорче Петров 209, чаир 184, Бутел 148, Адродром 141 и Кисела Вода 139 денари.
Во другите општини Охрид има највисока цена на закупнина од 487 денари за метар квдаратен, Прилеп 478, Штип 349, Куманово 240…