Сојузот на синдикатите на Македонија (ССМ) е задоволен и од решението со кое се предлага на работниците кои работат со авторски договор или договор на дела да им се плаќаат придонеси за здравствено и пензиско осигурување и ги поддржува измените на Законот за работни односи со кои на работниците им се дава право на избор дали ќе се пензионираат како досега или ќе го продолжат работниот век за една, две или три години, изјави денеска претседателот на ССМ, Живко Митревски.
– Ќе има повеќеслојна корист за сите, односно и за работниците и за работодавачите и за државата со оглед на тоа што ќе се елиминираат повеќе празнини кои се јавуваа, пред се на работа да останат висококвалификувани кадри со кои понекогаш се соочуваа одредени работодавачи, додека за работниците измените ќе озвозможат дополнително продолжување на работниот век кај оние категории кои сметаа дека со ова ќе обезбедат дополнителна социјална и материјална егзистенција, рече Митревски.
Според него, измените на законот за работни односи се поволно за сите и овозможува секој работник да процени кога ќе оди во пензија.
– Очекуваме во гранките како што се текстилниот и градежниот сектор работниците да го искористат своето право и побрзо да заминат во пензија, додека кај одредени гранки каде што има дефицит работниците да го продолжат работниот век – рече Митревски.
Со новите измени на Законот за работни односи, мажите ќе можат да одлучат дали ќе одат во пензија на 64, 65, 66 или 67 години старост, додека жените ќе можат да изберат дали да одат во пензија на 62, 63, 64 или 65 годишна возраст. Работникот до 31 август во тековната година ќе треба писмено да се изјасни дали го продолжува работниот век за наредната година.