На маргините на Конференцијата на земјите-учеснички на Брдо Процесот, министерот Никола Попоски оствари средби со неговите колеги од Словенија, Косово и од Албанија.
За време на разговорот со словенечкиот министер реафирмирани се заемните заложби за натамошно зајакнување на билатералните односи во сите области од заемен интерес, со акцент на европските и евроатланските интегративни процеси на Република Македонија.
Во оваа смисла е поздравено потпишувањето на меморандумот меѓу двете влади за меѓународна и развојна помош за периодот 2013-2015 година, како потврда за развојната и техничката помош што Словенија и ја дава на Македонија во ЕУ интегративниот процес на земјата.
Министерот Попоски уште еднаш ги подвлече стратешките надворешно-политички приоритети, изразени преку градење и негување на добрососедски односи со сите земји од непосредното и поширокото соседство во регионот.
На одвоените средби со министрите за надворешни работи на Косово и Албанија, министрите изразија задоволство од позитивниот тренд на билатералната соработка, при што се нотирани конкретни иницијативи и предлози со цел целосно искористување на потенцијалите кои се нудат за динамична добрососедска соработка. Констатирана е потребата од унапредување на економската соработка, како и забрзување на реализацијата на тековните проекти од патната инфраструктура и енергетското поврзување.