Вицепремиерот за европски прашања Арбр Адеми денеска остварил средба со Винченцо Амендола, државен потсекретар во Министерството за надворешни работи и меѓународна соработка на Република Италија, на која изразиле задоволство од досегашната соработка меѓу Македонија и Италија.
Како што соопшти Секретаријатот за европски прашања (СЕП), на средбата се разговарало за Берлинскиот процес и претстојниот самит на земјите од Западен Балкан во Трст, за актуелната политичка ситуација во земјата, како и за евроатлантските перспективи на Република Македонија.
– Вицепремиерот Адеми ја поздрави позицијата на Италија за континуираната и безрезервна поддршка за процесот на проширување и нашето членство во ЕУ, како и ставот на Италија дека сите земји од Западен Балкан треба да се приклучат кон ЕУ, час поскоро. Адеми истакна дека проектите финансирани од ЕУ за поврзување, особено во транспортот и енергијата, кои се од суштинско значење и за развојот на нашата економија, треба да се прошират и на Македонија, информира СЕП.
Адеми побарал поддршка од Италија за напорите за пристапување на Македонија во Јадранско-јонскиот регион и стратегија, потврдувајќи го, како што се наведува во соопштението, регионалниот аспект и целосната вклученост на земјата во трансевропските програми.
