Претседателот на Социјалдемократскиот сојуз Зоран Заев и генералниот секретар Оливер Спасовски, денеска остварија средба со делегација на Кралството Шведска предводена од Торбјорн Сохлстром, генерален директор за политички работи и Матс Стафансон, амбасадор на Кралството Шведска во Република Македонија.
На средбата заеднички беше заклучено дека спроведените двојни избори во Македонија влијаат и на идните чекори на државата во однос на евро – интеграцискиот процес.
Претседателот Заев истакна дека со овие избори се покажа дека владејачката партија не сака да спроведе фер и демократски избори. Со повеќегодишните уцени и закани како и директното купување гласови власта овозможи системска контрола врз гласачите.
-Слободната волја на граѓаните на Република Македонија на овие двојни избори беше погазена. Поисоветувањето на државата со партијата, необјективноста на медиумите, партизираното судство и нефункционалните институции што се дел и од забелешките нотирани во Извештајот на ОБСЕ/ОДИХР се дел од причините зошто СДСМ не го признава изборниот процес и нема да ги прифати пратеничките мандати, истакна Заев.
Заеднички беше констатирано дека е потребно да се прават чекори што ќе придонесат кон нормализирање на институциите на државата се со цел да се овозможи фер политичка борба во Република Македонија.
Генералниот директор за политички работи, Сохлстром ги поздрави активностите на СДСМ и учеството во кампањата за европските избори во Стокхолм како и формирањето на партиските организации на Социјалдемократскиот сојуз во Гетеборг и Малме.
