Претседателот на собраниската Комисија за надворешна политика Антонио Милошоски оствари работна средба со израелскиот амбасадор Јозеф Амрани, кој престојува во неколкудневна посета на Република Македонија.
На средбата, соопшти собраниската прес-служба, заеднички е истакнато дека пријателските македонско-израелски односи отвораат голем простор за соработка особено во областа на економијата, одбраната и образованието.
Израелскиот амбасадор се заблагодарил за поддршката што Македонија му ја дава на Израел на мултилатерално ниво. Исто така, го истакнал односот на македонската држава кон еврејското прашање и изградбата на Меморијалниот центар на холокаустот во Скопје, како најдобар пример во Европа.
Милошоски и Амрани се согласиле дека пријателските билатерални односи треба да бидат дополнителна причина за продлабочување на парламентарните односи помеѓу македонското Собрание и израелскиот Кнесет.
МИА