Министерот за внатрешни работи Оливер Спасовски, денеска имаше работна средба со Насер Селмани и Столе Наумов, претставници на Здружението на новинари на Македонија.
На средбата, соопшти денеска МВР, било дикутирано за нападите врз новинарите и медиумите кои се случија во изминатиот период во Република Македонија.
Министерот Спасовски и претставниците на ЗНМ се согласиле дека нападите врз новинарите претставуваат директен напад врз основното право на граѓаните да бидат информирани и тие не смеат да бидат толерирани.
Како што стои во соопштението од МВР, Спасовски потенцирал дека во интерес на почитување на демократските принципи, ќе бидат превземени сериозни мерки за итно расветлување на овие инциденти. Тој ја изразил подготвеноста на Министерството за внатрешни работи за понатамошна соработка со ЗНМ, со цел обезбедување на достоинствени услови за вршење на новинарската професија.