Министерот за надворешни работи, Никола Попоски, на нејзино барање, оствари средба со јавниот заговарач за РЕКОМ (Регионална Комисија за утврдување на фактите за воените злосторства од 1991-2001 година) во Република Македонија, проф. Билјана Ванковска.
На средбата во МНР, Попоски беше запознаен со суштината, целта и досегашниот тек на регионалната иницијатива за формирање на Комисија за утврдување на фактите за воените злосторства на територијата на поранешна Југославија од 1991-2001 година.
Ванковска, соопшти денеска МНР, достави пакет материјали, вклучувајќи го и предлог-Статутот на РЕКОМ, како суштински документ околу кој ќе треба да се усогласат државните водства на засегнатите седум држави од регионот.
Во разговорот посебен акцент бил ставен врз досегашните активности на Коалицијата за РЕКОМ, како неполитичка регионална мрежа на граѓански организации и поединци, во регионот и во Република Македонија. На средбата било нагласено дека РЕКОМ, чија суштина е утврдување на фактите за воените злосторства и јавно говорење за нив, има поддршка од ОН, ЕУ, Советот на Европа и голем број земји.
Министерот Попоски изрази поддршка за активностите на РЕКОМ, потенцирајќи дека соочувањето со конфликтното минато и обелоденувањето на судбината на жртвите и исчезнатите е од големо значење за воспоставувањето траен мир за идните генерации во регионот и дека е во духот на помирувањето во регионот.