Градоначалникот на Охрид Александар Петрески денеска оствари средба со делегација на ОБСЕ/ОДИХР, предводена од Герт Ахренс и Карола Касбург, на која било разговарано околу текот на изборната кампања и залагањето за фер и демократски избори.
Притоа градоначалникот Петрески и кандидат за трет мандат на коалицијата „Заедно за Македонија“ ја искажал својата желба за мирно спроведување на кампањата и изборите и без нерегуларности на самиот изборен процес.
Инаку, во насока на спроведување фер и демократски избори кандидатите за градоначалници на општина Охрид утре ќе го потпишат „Кодексот на однесување за слободни и фер избори“, организиран од Институтот за парламентарна демократија и Националниот демократски институт.
Во Кодексот е потенцирано дека слободните и фер избори се камен-темелник на демократијата. Сите партии и кандидати се еднакви пред законот, должни се јавно да го осудат насилството и заплашувањето, ќе ја потенцираат тајноста на гласот, а мора да преземат и чекори за елиминирање на сите форми на изборен фалсификат пред, за време и по денот на изборите.