Градоначалникот Зоран Дамјановски, денеска во црквата „Свети Никола“, оствари средба со новоназначениот митрополит, досегашен епископ на новата Кумановско-осоговска епархија Јосиф.
На средбата Дамјановски ја потенцираше важноста за православните верници од формирањето на новата епархија со седиште во Куманово и од назначувањето на новиот митрополит.
– Посебна чест и задоволство ми е да му го честитам назначувањето на митрополит на Кумановско-осоговската епархија. Овој настан е исклучителено важен за нашето духовно живеење. Отворивме разговор за понатамошна соработка помеѓу локалната самоуправа и митрополитот, рече Дамјановски. Тој додаде дека најдобриот пат за промоција на мирот и толеранцијата е духовното живеење, особено за мултикултурна и мултирелигиозна средина како што е Куманово.
И митрополитот Јосиф се надева на успешна соработка со општината.
– Со одлука на светиот архиерејски Синод на Македонската православна црква претходната недела бев избран за надлежен митрополит во Кумановско осоговската епархија. Јас и претходно бев викарен епископ на блажено упокоениот митрополит Кирил, така што состојбите во овој дел на поранешната полошко- кумановска епархија ми се добро познати, рече митрополитот Јосиф.
Куманово, нагласи тој, првпат во историјата доби своја митрополија, што е придонес за христијаните.Митрополитот најави дека ги подготвува плановите за работата во новата Кумановско-осоговска епархија.
ФОТО: kumanovonews