Српскиот државјанин С.М. (42) е уапсен во Скопје во заедничка координирана акција на македонската и српската полиција, под сомнение дека подготвувал платено убиство.
Како што пренесуваат српските медиуми, неговото лоцирање е резултат на подолготрајна оперативна соработка и размена на информации меѓу Службата за сузбивање на криминалот (УКП) на Србија и Министерството за внатрешни работи на Македонија.
Осомничениот бил пронајден во засолниште во Скопје, каде при полициска рација бил откриен арсенал оружје и тактичка опрема.
Меѓу запленетите предмети се пиштол од марката „CZ“, воен нож и црна тактичка униформа. Според истрагата, 42-годишникот нелегално ја преминал државната граница, а кај него била пронајдена и српска лична карта на друго лице, која ја користел за лажен идентитет.
Оперативните информации укажуваат дека С.М. е поврзан со организирана криминална група и дека во Скопје пристигнал со конкретна задача – извршување ликвидација.
Надлежните институции продолжуваат со истрагата за утврдување на нарачателот, мотивите и евентуалните соработници на осомничениот.