Министерот за внатрешни работи Оливер Спасовски денеска изјави дека работат на тоа да им се влезе во трага на поранешниот началник на Петтата управа Горан Грујовски и на Никола Бошковски кои се обвинети во случаите „Таргет“ и „Тврдина“ на Специјалното јавно обвинителство.
– Со оглед на истрагата и на постапките, не можеме да излегуваме со детали, меѓутоа сите информации коишто ги имаме заедно со Специјалното јавно обвинителство, кое е надлежно за овој случај, работиме на тоа да ги обезбедиме овие две лица за органите на прогонот и да може да продолжи постапката која што е поведена во овој случај, истакна министерот Спасовски, одговарајќи на новинарско прашање по посетата на СВР Скопје.
Спасовски додаде дека немаат сознанија дали Грујовски или било кој друг обвинет во случајот имаат двојно државјанство.
Грујовски и Бошковски повеќе од еден месец се во бегство откако Врховниот суд по повеќедневно пролонгирање им го потврди притворот што претходни го одреди Кривичниот суд. По нив е распишана и меѓународна потерница.
