Комисијата за земјоделство, шумарство и водостопанство на СДСМ, одржа тематска Конференција на тема “Состојбите во земјоделството – како понатаму“, на којашто учествуваа претставници од повеќе општински организации на СДСМ.
Се разговараше за клучните проблеми во земјоделството – неправедната распределба на државното земјоделско земјиште, за слабиот откуп на земјоделските производи, за користењето на субвенциите како уценувачки механизам иако тие им се загарантирани со закон на земјоделците, штетите од нередовната исплата, целосната зависност на земјоделците од државата – состојба во којашто се свесно ставени. Се анализираа лошите резултати во растителното и сточарското производство, проблемите со наводнувањето, бројните проблеми во шумарството. Посебно се разгледуваше неискористеноста на европските фондови во земјоделството, како и дисфункционалноста помеѓу примарното земјоделство и преработувачката индустрија.
Наспроти влошената состојба во земјоделството, се предлагаат решенија за настанатите проблеми со крајната цел – развој на земјоделското производство.
Констаирано е дека македонското земјоделство треба да ги користи искуствата на успешните европски земјоделски политики, прилагодени кон спецификите во Македонија и да се градат системски земјоделски политики што можат да дадат резултати во развојот на аграрот и враќање на достоинството на земјоделецот во Македонија.
Секое покрупно решение во земјоделството треба да биде дел на интегрираната економска политика на власт што ќе биде посветена на решавање на лошите состојби, а не на генерирање проблеми од популистички побуди, каков што е случатој последниве години во Македонија.
Ова е прв вид на ваква активност на Комисијата за земјоделство, шумарство и водостопанство да се дебатира и да се утврдуваат квалитетни предлог решенија на ниво на Конференција. Во наредниот период вакви тематски конференции Комисијата ќе одржи во повеќе градови низ Македонија.