Денешната состојба во Прилепско е мирна. Студеното време и снегот ги запреа поплавите. Сообраќајот на сите патни правци се одвива непречено, информираа денеска од Регионалниот центар за управување со кризи во Прилеп.
– Нема застој во сообраќајот, се одвива во зимски услови, Плетвар е опесочен, вели Илко Петкоски, раководител на Центарот.
Денеска преку Црвениот крст од Прилеп се доставува помош за 20 најзагрозени семејства во неколку села во општина Долнени.
– Во тек е дистрибуцијата на помошта во најзагрозените 20 семејства. Секое семејство ќе добие по пакет хигиенски средства, пакет храна, по три ќебиња, средства за дезинфекција и вода за пиење, вели Катерина Кочоска од Црвениот крст од Прилеп.
Од Центарот за јавно здравје велат дека останува неисправна водата во петте најзагрозени села: Тројкрсти, Чепигово, Ерековци, Канатларци и Кадино Село.
– Во овие села категорична е забраната за пиење на водата, ниту е за домашна употреба, ниту за стоката. Според распоред дневно им се доставува вода за пиење во шишиња и технолошка вода од цистерни. Денеска во училиштата во тие населени места ќе почне едукација на децата за како да се заштитат од зарази и да се придржуваат на упатствата од Центарот за јавно здравје, вели Гоце Ингилизов, директор на Центарот.
Ингилизов објаснува дека јавното претпријатие „Водовод и канализација“ денеска со нова опрема ќе врши засилено хлорирање на водата од бунарите во селата Канатларци и Галичани, но дополнително ќе се утврдува дали ќе биде исправна, а забраните за пиење се уште важат.
– Земени се нови 17 примероци вода, од кои два од градскиот водовод од Прилеп и 15 од населени места и сите се исправни. Сега е исправна и водата за пиење во Мало и Големо Коњари, објаснува Ингилизов.