Полето во Прилепско се уште е под вода иако се повлекува, но по вчерашниот критичен ден, состојбата полека се стабилизира, информира градоначалникот на Прилеп, Марјан Ристески.
Тој денеска заедно со вицепремеирот и министер за финасии Зоран Ставрески и претставници на Општинскиот кризен штаб и Центарот за управување со кризи ги посети наслените места Тополчани и Чепигово.
– Во изминатите два дена наврнаа преку 66 литри на метар квадратен со што е поплавен пелагонискиот регион. Водостојот на Црна Река денеска е намален за 50 сантиметри, но се уште постои можност за излевање. Браната на вештачкото езеро е стабилна иако водата се излева. Се изпуштаат по 1 200 литри вода во секунда, рече Ристески.
Во градот, додаде, нема посериозни проблеми, а градската река го достигна максималното ниво вода дури до мостовите.
– Најкритично беше во селата Клепач, Тројкрсти и Тополчани. Електрична енергија се уште нема во Големо Коњари, а во Мало Коњари наместа се интервенираше со багер да се направат испусти на патот. Има пријави дека одредени села во Мариово немаат електрична енергија. Екипите на ЕВН се на теренот, посочи Ристески.
Нагалси дека препораката од надлежните е водата за пиење да се преврива, особено во населените места кои се снабдуваат со вода од свои бунари и не се на системот „Студенчица“ чија вода е исправна. Центарот за јавно здравје перманентно прави проверки на водата.
Порача доколку има семејства на кои им е загрозен домот, да се обратат во Општината и оти просторот во касарната „Мирче Ацев“ им стои на располагање.
– Инситутиците остануваат на теренот, а допрва наредните денови комисиите ќе бидат на терен за да се знаат колкави се штетите од поплавите, рече Ристески.