Денес, во Министерството за надворешни работи на Република Македонија, се одржа состанок на претставниците надлежни за односи со јавност во Министерствата за надворешни работи и Министерствата за одбрана на земјите-членки на САД-Јадранската Повелба (САД, Република Македонија, Република Хрватска, Република Албанија, Црна Гора и Босна и Херцеговина), на кој учествуваа и земјите-набљудувачи (Република Словенија и Република Косово).
Состанокот се одржа во рамките на претседавањето на Црна Гора со САД-Јадранската Повелба за 2018 година, а беше ко-организиран од Министерството за надворешни работи и Министерството за одбрана на Република Македонија, со поддршка на прес-службата на Владата на Република Македонија.
Состанокот, кој тематски беше посветен на „Предизвиците во стратешките комуникации на лицата одговорни за односи со јавност во европскиот и евро-атлантскиот интегративен процес“, беше искористен за размена на мислења, ставови и искуства во контекст на согледување на предизвиците, со посебен акцент на европските и евро-атлантските интегративни процеси на земјите од регионот.
Во оваа прилика учесниците имаа можност да го посетат и PARC центарот, единствениот НАТО-сертифициран центар за обука за односи со јавност, кој се наоѓа во Република Македонија.