Градоначалникот на општина Кисела Вода Билјана Беличанец-Алексиќ заедно со претставници на општинската администрација, месните заедници, директори на градинки и училишта и претставници од Полициската станица Кисела Вода и Одделението за превенција од криминал при СВР Скопје ноќеска извршија обиколка на повеќе воспитно-образовни објекти, паркови и игралишта каде во ноќните часови се собираат малолетници кои консумираат алкохол и остануваат до раните утрински часови.
Како што соопшти Општина Кисела Вода, тие ги посетиле дворовите на ОУ „Круме Кепески“, градинките „Расадник“ и „Пржино“ при „8 Март“, парковите „Македонија“ и „Шопен“, неколку напуштени објекти и игралишта…
Со лицата кои биле затекнати е разговарано и им се објаснети законските правила и прописи, со цел едукација и подигање на свеста за превенција од ситуации кои можат да доведат до посериозни нарушувања на јавниот ред и мир и безбедноста на жителите на ова подрачје.
Заедничките полициски патроли меѓу полициските службеници и единиците на локалната самоуправа кои се дел од стратешката рамка за обезбедување поволни безбедносни услови за живеење на сите жители на општина Кисела Вода, се наведува во соопштението, ќе продолжат и во наредниот период.
Дополнително, во тимовите ќе бидат вклучени и родители на кои ваквите акции треба да им обезбедат информација каде се движат и што прават нивните малолетни деца во текот на вечерните излегувања и дали има потреба од дополнителна комуникација меѓу нив во однос на укажаната доверба.