Сообраќајот на сите патишта се одвива без забрани и застои, по наместа влажни коловози, информира Авто-мото сојузот на Македонија.
Слаб снег провејува во Крива Паланка, Страцин, Куманово, Попова Шапка, Гостивар, Стража, Маврово, Крушево, Кичево, Буково, Ѓавато, Павлешенци, Кочани, Делчево, Смојмирово и Струмица.
АМСМ препорачува внимателно возење, прилагодена брзина на движење и почитување на поставената сообраќајна сигнализација. Посебно внимание е потребно на делниците кои минуваат низ клисурите и засеците, особено на патните правци Катланово – Велес, Маврово – Дебар – Струга, Гостивар – крак Маврово, Демир Капија – Удово, Кочани – Делчево и Виница – Берово, каде е можна почеста појава на одрони.
Од АМСМ потсетуваат дека од 15 ноември на сила е законската обврска за задолжително поседување на зимска опрема во возилата, без оглед на моменталната временска состојба, која ќе трае до 15 март годинава.
