Сообраќајот на сите државни патишта во Македонија се одвива отежнато и во зимски услови, со остатоци од снег по коловозите. Поради ниските температури во ноќните часови се забележува појава на голомразица.
АМСМ препорачува исклучително внимателно возење, прилагодена брзина на движење и почитување на поставената сообраќајна сигнализација. Посебно внимание е потребно на делниците кои минуваат низ клисурите и засеците, особено на патните правци Катланово – Велес, Маврово – Дебар – Струга, Демир Капија – Удово, каде е можна почеста појава на одрони.
Забрани за тешки товарни возила има на патните правци Гостивар – крак Маврово – Дебар, Дебар – Струга, како и на планинските премини Стража, Буково, Пресека. Забраната за движење на планинскиот премин Пресека важи и за автобуси.
Забраните за движење на тешки товарни возила на патниот правец Струга – граничен премин Ќафасан и планинскиот премин Ѓавато се укинати.
Интензитетот на сообраќајот на патните правци надвор од градските средини е умерен.
На граничните премини нема подолги задржувања за влез и за излез од државата.