„Левичарското движење Солидарност со радост ја дочека победата на Сириза на изборите во соседна Грција. На Сириза и’ посакуваме успешен мандат и се надеваме ќе ја има силата да се справи со предизвиците кои ја очекуваат.
Резултатот од изборите во Грција уште еднаш го потврдува фактот: идејата на автентичната левица не само што не е маргинална или утопистичка, туку дека таа се покажува како вистинска и нужна опција во овие кризни времиња.
Победата на Сириза, во таа смисла, отвара нов простор за сите левичарски партии и политички организации во Европа и регионот. Изборна победа на автентичната Левица не е веќе нешто недостижно, туку нешто, како што Сириза ни покажува, многу можно и остварливо.
Во таа смисла Солидарност, како левичарско движење кое има значајна улога во политичкото артикулирање на левата политичка идеја во Македонија, ја афирмира и потенцира својата основна цел: остварување на суштински општествени промени. Ние продолжуваме да работиме со сите средства создавање на социјално праведна, економски одржлива и демократска Македонија на среќни и рамноправни граѓани кои ќе имаат можности и инспирација за активно вклучување во општествениот живот, и влијание врз донесувањето на политичките одлуки.
Солидарност и досега беше сојузник на работниците, на стечајците, на обесправените, на студентите, на осиромашените, понижените и замолкнатите. Ние продолжуваме да се бориме за нивните права. Подемот на Левицата во Европа уште еднаш ни потврдува дека сме на вистинскиот пат“, се вели во соопштението на левичарското движење „Солидарност“.