Собраниската расправа за разрешувањето на јавниот обвинител Марко Зврлевски ќе продолжи во попладневниот дел, откако претседателот на Собранието Талат Џафери ја прекина по третпат.
Досегашниот дел од денешната собраниска седница ја одбележаа неколку прекини и спорење околу легитимноста на расправата за разрешувањето на Зврлевски кога веќе се закажани локални избори.
Седницата е предвидено да продолжи во 15:30 часот.
Илија Димовски од ВМРО-ДПМНЕ во продолженито по втората пауза во процедурална забелешка апелираше за избегнување тензични моменти во Собранието и побара сите заедно да апелираат Државната комисија за антикорупција побрзо да се произнесе.
– Да продолжиме со некои други точки. Има закони кои се однесуваат позитивно за граѓаните предложени и од ВМРО-ДПМНЕ и од СДСМ. Можете да закажете итна седница за пожарите и за договорот со Бугарија, изјави Димовски.
Џафери рече дека не може да прави преседан работата на Собранието да зависи од нечии мислења и во тој контекст посочи дека нема пречка да работи додека не се добие мислење.
Крсто Муковски од ВМРО-ДПМНЕ рече дека ако се продолжи со расправата се дерогира Собранието и посочи дека треба да се разговара и прифати предлогот на пратеникот Артан Груби за тоа новиот јавен обвинител да биде избран со 2/3 мнозинство.
Собранискиот спикер на самиот почеток на денешното продолжение на шестата седница на Собранието даде пауза откако претходно пратениците од ВМРО-ДПМНЕ присутни во салата застанаа пред говорницата.
Во продолжението по првата пауза собранискиот спикер Џафери цитираше делови од Деловникот со цел да укаже на тоа на кој начин треба да се санкционираат процедурите за одржување на редот во Собранието на РМ и каква е улогата на Претседателот на Собранието во тој поглед.
Пратеникот Антонио Милошоски од ВМРО-ДПМНЕ во процедурална забелешка посочи дека тој не ја узурпира говорницата и со ниту еден негов потег не го нарушил работењето на Собранието и побара да не се крши изборниот законик и да не се толкува произволно изборниот законик кој што е донесен со консензус.
На дневниот ред на денешната седница на Собранието е расправата за разрешувањето на јавниот обвинител Марко Зврлевски. На почетокот пратеникот Илија Димовски од ВМРО-ДПМНЕ го повтори ставот дека барањето за разрешување на Зврлевски е незаконско и спротивно на Деловникот и повторно побара оваа точка да се симне од дневниот ред додека не се изјасни Комисијата за антикорупција.
Како што се наведува во образложението, Владата предлага Собранието да го разреши Јавниот обвинител поради незаконско, ненавремено и недоволно стручно вршење на функцијата. Во документот стои и дека Зврлевски со своето однесување и дејствување покажал дека не е способен за извршување на функцијата и дека го нарушува нејзиниот углед.