Собранието на денешното продолжение на 131. седница ги изгласаа Законот за ратификација на Амандманот кон Монтреалскиот протокол за супстанциите што ја осиромашуваат озонската обвивка, како и Законот за ратификација на Минамата Конвенција за жива.
Претениците ги донесоа Финансискиот план на Агенцијата за супервизија на капитално финансирано пензиско осигурување за 2020 година, како и Финансискиот план на Агенцијата за супервизија на осигурување за 2020 година.
Во Собранието почна и расправата по Дополнетиот предлог закон за енергетска ефикасност во второ читање.
Пратеникот од ВМРО – ДПМНЕ Зоран Илијоски рече дека со овој закон се врши усогласување со директивите на Европската комисија нешто, што според него, требаше да биде завршено пред две години. Тој додаде дека ова всушност говори како работи оваа Влада.
Овој закон, како и многу закони досега е испратен на Комисијата за европски прашања, а не на матичната Комисија за економски прашања. Според Илијоски, власта се обидува на мала врата да ги протне измените на овој закон.
Диме Велковски од СДСМ реплицирајќи му на Илијоски рече дека со ова законско решение се формира енергетски фонд од 25 милиони евра, кој што има за цел да се направат енергетски ефикасни јавните згради заради заштеда на енергија и за намалување на загадувањето.
По редовната пауза пратениците попладнево ќе продолжат со дискусија по оваа точка од дневниот ред.
На 131. седница се и предлог-измените на Законот за надворешни работи, Предлог-законот за Агенција за проверка на носители и кандидатите за носители на јавни функции, Предлог-измените на Законот за надворешни работи, Предлог-законот за Агенцијата за разузнавање…