Собранието на Република Македонија денеска треба да ја одржи 49 седница, на која на дневен ред се Предлогот за избор на судија на Уставниот суд, Предлог одлуката за избор на Народен правобранител, Предлогот за именување член на Регулаторната комисија за енергетика и Предлогот за огласување именување на Јавен обвинител.
Пратениците ќе дебатираат и за Предлог одлуките за изменување на Одлуката за избор на претседател, заменик на претседателот, членови и нивни заменици на Комисијата за прашања на изборите и именувањата на Собранието на Република Македонија, за изменување на Одлуката за избор на претседатели, заменици на претседателите, членови и нивни заменици на комисиите на Собранието, како и за изменување на Одлуката за основање на пратенички групи на Собранието на Република Македонија за соработка со парламентите на други држави и избор на претседатели и членови на тие групи.
Меѓу точките се и Предлог одлуката за разрешување и именување на претседател и членови на Одборот за доделување на државната награда “Гоце Делчев”, Предлог одлуки за престанок на мандат на член на Државниот совет за превенција на малолетничко престапништво и за избор на членови на тој Државен совет.
Треба да бидат разгледани и предлог законите за ратификација на Осмиот дополнителен протокол на Уставот на Светскиот поштенски сојуз, на Договорот за воена финансиска соработка помеѓу владите на Македонија и на Турција и Протоколот за спроведување на финансиска поддршка помеѓу владите на двете земји.
Собранието терба да се произнесе и по измените и дополнувањата на Законот за азил и привремена заштита, Законот за личната карта, на Кривичниот законик, на Законот за Академијата за судии и јавни обвинители, на Законот за користење и располагање со стварите на државните органи и за Предлог законот за приватно обезбедување, сите во второ читање.
Во сферата од економијата предвидена е дебата за измените и дополнувањата на Законот за персоналниот данок на доход, дополнетите предлог закони за дополнување на Законот за платниот промет и на Законот за трговските друштва, сите во второ читање и Предлог законот за изменување и дополнување на Законот за хартии од вредност во прво читање.
По скратена постапка во прво читање треба да се разгледат измените на Царинскиот закон и на Законот за игрите на среќа и за забавните игри.
Листата од речиси 30 точки на дневниот ред ја заокружуваат измените и дополнување на Законот за странците, на Законот за евиденциите од областа на трудот, Предлог-законот за упатување работници од РМ во други држави за изведување на градежни работи преку проектни договори и за вршење на други сезонски работи и Предлогот за разрешување на заменик на Народниот правобранител.