Собранието на Република Македонија попладнево ги донесе дополнувањата на Законот за земјоделство и рурален развој со кои се предвидува одлагање на законската обврска со која еден од условите за добивање на субвенциите беше земјоделците да немаат долгови кон Управата за јавни приходи.
Министерот за земјоделство, шумарство и водостопанство Љупчо Николовски, образложувајќи го законското решение, истакна дека со ваквата обврска се кочи исплатата на субвенциите за земјоделците.
– Станува збор за две одвоени законски постапки – едната за прибирање на даноци по разни основи од страна на УЈП, а другата за добивање на субвенции за земјоделците. Оваа законска обврска ја кочи исплатата на субвенциите и за Владата е нелогично да постои ваква обврска. Затоа сметаме дека сега треба да се направи одлагање на оваа одредба, а во иднина размислуваме за системско решение коешто нема да претставува пречка земјоделците да ги добиваат субвенциите, појасни министерот Николовски.
Во попладневниот дел од расправата беа донесени и одлуките за испраќање на припадници на Армијата на Република Македонија за учество во мировната операција „Алтеа“ во Босна и Херцеговина и во мировната операција УНИФИЛ во Либан.
Министерката за одбрана Радмила Шекеринска истакна дека ставот на Владата е дека треба да се продолжи со учество во мировните операции на Европската унија и Обединетите нации поради градење на кредибилитет на партнер на меѓународните организации и зголемување на капацитетите на Армијата на Република Македонија.
– На ваков начин и припадниците на Армијата и Македонија како држава која инвестира во стабилноста околу себе и во светот, ќе добијат поттик за реформи и подобра работа, рече Шекеринска.
Расправата по останатите точки од дневниот ред продолжува утре. Пратениците треба да ги разгледаат годишните извештаи на неколку институции, а како последна точка е изборот на заменици – министри во Владата на Република Македонија.