Владата го усвои Предлог законот за медијација со кој се предвидени крупни, суштински, сериозни реформи на правосудниот систем.
Како што соопшти денеска владиниот портпарол Александар Ѓорѓиев, законот изготвен врз основа на најдобрите светски практики содржи низа новини кои ќе им овозможат на граѓаните и компаниите многу поефикасно, побрзо и поекономично решавање на споровите.
Со постапката на медијација воедно, судовите ќе бидат растоварени за голем дел од постапките.
– Задолжително воведување на медијацијата пред судската постапка во определени случаи предвидени со материјалните закони, обезбедување субвенции од државата за одредени случаи на медијација, засилување на Комората на медијатори и формирање Одбор за медијација, се само некои од новините во законот, рече Ѓорѓиев.
За да се биде медијатор неопходно ќе биде добивање лиценца со претходно полагање испит во три дела, но и стручност, кредибилитет, способност и квалитет.
Како што информира портпаролот, со законот е дефинирано максималното траење на медијацијата да биде 180 дена.