Во организација на Здружението на граѓани „ТеРа“, денеска по седми пат во Гевгелија ќе се одржи натпреварот во традиционално готвење слатко од смокви – „Смоквијада 2013“.
Организаторите велат дека манифестацијата има за цел да го сочува традиционалниот начин на готвење слатко од зрели смокви, а од друга страна да го врати оригиналниот начин на пречекување гости во домот со слатко од смокви.
Натпреварувачкиот дел на манифестацијата ќе се одржи денеска на Ракометното игралиште во Гевгелија, каде повеќе од 15 екипи ќе варат слатко од зрели смокви, секој на свој начин и со свој рецепт.
Пред започнувањето на официјалниот дел на градското шеталиште ќе се одвива фолклорно дефиле со учесниците на „Смоквијада 2013“.
Прогласувањето на победниците од „Смоквијада 2013“ ќе биде утре на плоштадот во Гевгелија бидејќи, како што велат организаторите, квалитетот на слаткото е поверодостоен доколу се дегустира и оценува изладено.