Ивица Коневски е најуспешен градоначалник во Скопје за 2012 година, според анкетата на порталот „Скопјеинфо“. Второпласиран е градоначалникот на Карпош Стевчо Јакимовски, а третопласиран градоначалникот на општина Центар Владимир Тодоровиќ.
За најуспешните градоначалници одлучуваа повеќе од 20 илјади граѓани кои гласаа на веб-порталот „Скопјеинфо“, од 22 декември 2012 година до 15 јануари 2013 година. Анкетата заврши на 15 овој месец, а граѓаните гласаа за градоначалникот кој според нив работел најнапорно изминатата година и кој бил најпосветен на своите граѓани.
Ана Николова, претставник од „Скопјеинфо“, информира дека анкетата имала за цел да се наградат и мотивираат посветените и да им се даде мотив повеќе на останатите градончалници да се докажуваат оваа година.
Градоначалникот Коневски истакна дека за признанието кое го добива заслужен е и тимот кој работи со него во општина Аеродром. Тие, како што рече, работеа посветено и секојдневно.
Според него, ангажманот на општинската администрација и реализираните проекти се резултат на тимската работа.
– И понатаму ќе продолжиме да работиме во интерес на граѓаните и да реализираме многу проекти, рече Коневски.
Второпласираниот Јакимовски рече дека граѓаните ја препознаваат успешната работа и залагањето на градоначалниците. Смета дека општините Карпош и Аеродром се борат за прво место во Град Скопје, а дадените гласови, како што рече, се соодветни на расположението на граѓаните во Скопје.