Трговскиот центар „Скопје Сити мол”, на архитектите Грегори Ибанез, Звонко Тасевски, Крсте Петров и консултантот Илија Божиновски од фирмата ДСЦ Дизајн, е најуспешното реализирано архитектонско дело за 2012 година.
Големата годишна награда за архитектура синоќа ја врачи претседателот Ѓорге Иванов, кој е нејзин традиционален покровител.
Во обраќањето на свеченоста претседателот Иванов истакна дека Македонија може да се пофали со значајна традиција на македонски градители, чии градби се познати пошироко во регионот.
– Македонската архитектура претставува одраз и на традициите, вредностите и светогледот на македонскиот народ, па оттука секоја генерација архитекти има предизвик и обврска да ја усовршува и збогатува сликата на македонската архитектура. Одговорноста не е само кон нашите современици, туку и кон идните генерации. Впрочем, тие исто така ќе бидат сведоци на она што ние сме им го оставиле како архитектонско наследство“, посочи претседателот Иванов, упатувајќи честитки до добитниците на наградата.
Доделувањето на наградата го организира Асоцијацијата на архитекти на Македонија, во рамки на традиционалната новогодишна средба на архитекти. Наградата се доделена по 36-ти пат и претставува преглед на архитектонските дела во тековната година и валоризација на најуспешното достигнување во архитектурата.