Граѓаните на Скопје од денеска ќе можат да се разладуваат, забавуваат и рекреираат во првиот aква парк во главниот град. Официјалното отворање на водениот парк, кој е во состав на СЦ „Борис Трајковски“, е во 13:30 часот.
Во изминативе денови се вршеше тестирање на опремата со која располага Аква паркот, лоциран на северната страна на спортскиот центар, веднаш зад хотелот „Александар Палас“.
Станува збор за проект вреден 4,2 милиони евра.
На површина од 12.000 метри квадратни се изградени 10 тобогани, базен за деца, базен со бранови, мрзлива река, административна зграда со ресторан, три кафе-барови, санитарни јазли, соблекувални и прва помош. Под објектот има стандардизирани машински сали и современ систем за филтрација на водата.
Во новата летна атракција во Скопје ќе работат 35 спасители. Аква паркот ќе овозможи и 40 нови работни места, за лица кои ќе бидат ангажирани во угостителските објекти, три кафе-барови и еден ресторан. Ќе има редарска служба и просторија за давање итна медицинска помош.