Со целодневно бесплатно ставање функционирање на ски-лифтовите, Попова Шапка утре ја отвора скијачката сезона. Работата на ски-лифтовите ќе почне од 9.00 часот, најавуваат од ски-центарот.
Поради пропаднатата ланска сезона, сезонските билети од минатата година ќе важат и оваа скијачка сезона, а останатите билети остануваат со иста цена. Новина е можноста за туристички разглед со снеготапкач, велат од ски-центарот.
-Скијачкиот центар е целосно подготвен и екипиран за непречено и безбедно функционирање на ски-терените. Спроведени се редовните технички подготовки и активности за почеток и тек на новата ски-сезона, извршено е обележување на постојните патеки, а скијачките терени се подготвени со помош на машините за подготовка на скијачките патеки. За утрешното скијање во функција ќе бидат ставени жичарниците „Св. Илија“ и „Церипашина“ и ски – лифтовите „Аеродром“ и „Ге“, информираат од Попова Шапка.
Дневниот билет, кој важи од 9 до 15:30 часот, ќе се продава по цена од 1.000 денари, додека полудневниот билет, кој важи од 12 до 15:30 часот, е 700 денари. Билетот за ноќно скијање, кој важи од 19 до 22 часот, е 500 денари. За сите билети се наплаќа повратна кауција во висина од 150 денари. Новина е можноста за туристички разглед со снеготапкач по цена од 6.500 денари од час, велат од ски центарот.
Сите што имаат лански сезонски ски-билети треба да отидат во хотелот „Попова Шапка“ за да им бидат активирани и ставени во функција.