Крајниот рок за аплицирање на повикот за изградба на ски-патеки на Водно заврши вчера, а до Градот Скопје не стигнала ниту една понуда за партнер на проектот, објави „Алфа“.
– Во предвидениот период не пристигна ниту една понуда за ски-патека на Водно. Град Скопје дополнително ќе реши дали ќе ја повтори постапката – велат од Град Скопје.
Повикот на Градот за јавно- приватно партнерство за ски-патеки на Водно предвидуваше инвеститор на 25 години да го добие на стопанисување земјиштето околу врвот на скопската планина.
За возврат, обврските на приватниот партнер беа да го изгради комплексот со четири ски-патеки, три ски лифта, административен објект, ски-школа и други содржини, но и да префрла еден отсто од годишниот приход во градската каса.
Условите во тендерот беа пропишани по претходна студија за која Град Скопје плати 165.000 евра на австриски Суфаг Спорт во 2011-тата, јавува телевизијата.
Дискутабилно останува дали проектот е исплатлив поради климата и малите колични на снег на планината кои концесионерот ќе мора да ги надоместува со вештачки снег.