Синдикатот на вработените во управата, правосудните органи и здруженија на граѓани и Здружението на судската администрација, кои штрајкуваат седми ден, денеска порачаа дека преговорите со надлежните од судската власт треба да почнат што поскоро. Поради, како што соопштуваат, игнорантскиот однос кон нивните барања, најавуваат дека од понеделник ќе го радикализираат штрајкот.
Преку штрајкот судската администрација бара исплата на додатоци на плата во висина од 35 проценти исто како што тоа е предвидено кај судиите, јавните обвинители и службениците во јавните обвинителства.
До Министерството за правда и Судскиот буџетски совет, како што најавија претходно, вчера доставиле Предлог – спогодба, која, според нив, може да биде основa за решавање на нивното барање, но, соопштуваат, игнорантскиот однос и понатаму продолжува.
– Надлежните од судската власт треба да сфатат дека преговорите треба да почнат што поскоро, веднаш, а не утре, бидејќи секој ден е значаен, државата и граѓаните трпат огромни штети. Нивниот игнорантски однос уште повеќе ги револтира вработените и ги поттикнува да го радикализираат штрајкот. Затоа од понеделник во судовите нема да се издаваат апостили, а од вторник скопските судови ќе протестираат пред Министерството за правда за да ги потсетат надлежните дека во тек е штрајк и оти барањата на Синдикатот што побрзо треба да се прифатат, се вели во соопштението од Синдикатот на УПОЗ.
Информираат и дека со претставка се обратиле до Народниот правобранител на Македонија и укажале на, како што наведуваат, дискриминацијата и повредата на правата на судските службеници.