Кандидатката за претседател Гордана Силјановска Давкова на денешната посета во Виница рече дека е уверена дека државата во јуни нема да го добие датумот за преговори или „повторно ќе добие формулации од типот на уште нешто да се исполни и да се реализира“.
„Далеку од тоа дека јас не сакам мојата и вашата земја Македонија да ги добие преговорите, впрочем 9 пати добивавме позитивен извештај и од Европскиот Парламент и од Европската Комисија само што Советот велеше дека не е дојдено времето за преговори. Мислам дека и овој пат до тоа нема да дојде, не само затоа што ЕУ и самата си има домашни задачи и проблеми особено по Брегзит, туку и затоа што на дневен ред ќе дојде анализата на исполнетоста неисполнетоста на критериумите за почеток на преговорите. А тие критериуми оваа држава и оваа власт не ги исполнува. Единствената реформа која што ја направи е болната промена на името на Република Македонија“, вели Силјановска Давкова.
Силјановска Давкова нагласи дека таа лично се залага за владеењето на правото, правна држава, и почитување на човековите права, истакнувајќи дека во моментот во државата нема судски реформи бидејќи на чело на Советот кој што треба да се носат судски реформи се наоѓа Зоран Заев, а самиот тој бил предмет на истрага, односно како што рече таа ова е непознат феномен во судството кое треба да е целосно независно од извршната влада.
„Како ќе има судски реформи ако на чело на советот за судски реформи стои премиерот? Нели е тоа директен упад во независноста на судството. Во тоа тело треба да седат врвни правници, судии, адвокати, но не и премиерот на владата. Особено што и самиот беше предмет на истрага“, вели таа.
Силјановска Давкова рече дека една од првите мерки што ќе ги спроведе доколку стане претседател е откажување од привилегиите што ги имале претходните претседатели, бидејќи во сиромашна држава претседателот на државата треба да живее, сочувствува и да ги разбира граѓаните.