Македонската претседателка Гордана Сиљановска-Давкова порача дека не треба никогаш повеќе да дозволиме поради манипулација, корупција и занемарување на стандарди да страдаат невини жртви.
Таа во обраќање до јавноста рече дека најтешко повредените се транспортираат на специјализираните болници во Бугарија, Србија, Грција и Турција, заради добивање соодветна нега.
„Никогаш нема да го заборавиме овој добродетелски чин. Почитувани и сакани граѓани, ве молам, водени од емпатијата да се сплотиме во болката. Не е време за делби и конфронтации, особено кога се во прашање млади луѓе, чиј живот згасна поради манипулација. Ниту еден одговорен не смее да избегне казна. Да ги здружиме силите околу преживеаните, да не дозволиме никој повеќе да ги загрозува животите на невините луѓе. Никогаш да не дозволиме да ги занемаруваме стандардите“ – порача Сиљановска – Давкова.
Рече дека ништо не е повредно од човечкиот, односно од младешкиот живот.
Таа рече дека нема зборови на утеха за семејствата на загинатите.