Наша прва цел е да победиме на првите два натпревара против Чиле и Катар и да се пласираме во осминафиналната фаза на Светското првенство, а потоа во зависност од освоеното место во групата ќе се правата следните калкулации. Но, иако сме поквалитетни од овие два противника, не смееме ни да помислиме дека тоа ќе бидат лесни натпревари и затоа треба да влеземе максимално борбено и да одиграме како што посакуваме за да ја постигнеме целта, истакна селекторот на македонската ракометна репрезентација Ѕвонко Шундовски, по завршувањето на еден од последните тренинзи пред настапот на Мундијалот во Шпанија.
Тој искажа задоволство од подготовките во Пореч и покажаната желба на играчите да се докажат и да ја оправдаат неговата доверба, но сепак нагласи дека сеуште не одлучил кои 17 ќе патуваат на Светското првенство.
Шундовски како неминовно го оцени подмладувањето на репрезентацијата.
– Не очекувам дека вклучувањето на неколку помлади репрезентативци на сметка на повозрасните и поискусни ракометари кои не добија повик за шампионатот, ќе има негативни последици врз резултатите. Напротив, спојот на искуството и младоста може да биде дополнителен мотив за постигнување на подобри резултати, рече македонскиот селектор.
Македонија во рамките на подготовките за настапот на СП, утре во Ниш ќе одигра пријателски натпревар со Египет, а в сабота исто така во Ниш ќе има контролка со домаќинот Србија.
За Шпанија македонските ракометари патуваат на 11 јануари, а првиот дуел го играат на 12 јануари против Чиле во Севиља. Покрај Чиле во групата Б со Македонија се и Катар, Русија, Исланд и Данска.
Првите четири репрезентации продолжуваат во осминафиналната фаза.