Универзитетот „Гоце Делчев“-Штип денеска свечено одбележа шест години од своетот постоење. Ректорот Саша Митрев и проректорот Блажо Боев го отворија Научно-истражувачкиот центар во Кампус 2, каде се лоцирани техничките факултети.
Митрев истакна дека центарот е формиран од повеќе лаборатории од областа на техничките и биотехничките науки и фармацијата.
– Ова е на некој начин и никулецот на научно-истражувачкиот центар што имаме намера да го изградиме. Тоа е нова зграда од околу 4 .000 до 5.000 метри квадратни, во кој ќе го сместиме овој никулец, кој сега е на простор од околу 1.500 метри квадратни. Во новиот објект својата научно-истражувачка работа ќе ја вршат повеќе факултети и научници, рече Митрев.
По повод патрониот празник, на Штипскиот универзитет беше откриена и биста на Аристотел во кругот на Кампус 2. Проректорот на УГД Кирил Барабареев рече дека Аристотел е избран зашто цели две илјади години е најголем авторитет во науката и филозофијата и е основоположник на десетина науки.
– Еден од најумните и најучени Балканци, чиј клучен придонес на античкиот Балкан кон европската, светската наука и цивилизација е толку голем што повеќе нив ги прави балканско продолжение, отколку што Балканот го остава да биде само евопски или светски дел, оти тој го промовираше разумот, логосот во централен принцип и најважен критериум на човечкиот живот, рече Барабреев.
На свечената седница беа доделени и награди на четворица најдобри студенти, со просечна оценка 10, беа промовирани новите магистри и двајцата нови доктори на науки – Александар Крстев и Ферад Шаран.