Претседателот на Советот на обвинители, Коле Штерјев денеска не сакаше да одговори за спорниот избор на две обвинителки во Советот. Рече дека во текот на неделата ќе свика прес-конференција на кој ќе објасни се. Денеска не можел да говори пред новинарите, затоа што, како што рече, не бил подготвен.
Заменикот министер за правда Оливер Ристовски, на новинарско прашање дали е запознат со скандалот во Советот на јавни обвинители, во кој постојат сомневања за судир на интереси и непотизам, рече дека знае за што станува збор и дека лично очекува оставка од обвинителките кои не се изземале кога требало да гласаат.
„Макфакс“ објави дека Советот на јавни обвинители на седница во јануари донел одлука да не избере обвинителка во Обвинителството за гонење на организиран криминал и коруција, а за одлуката гласала една од обвинителките која е сопруга на осомничен банкар за перење пари, кого нејзината колешка кривично го гони. Претходно медиумите објавија и дека Коле Штерјев гласал за изборот на неговата внука во Обвинителството за гонење на организиран криминал и коруција.
В.М.