Адвокатот Петре Шилегов остро реагираше на обвинителниот акт за трагедијата во кочанскиот ноќен клуб „Пулс“, наведувајќи дека документот е полн со правни недостатоци и сериозни логички пропусти.
Во излагањето пред судот, Шилегов потенцираше дека судската постапка мора да обезбеди фер и правично решение за сите засегнати страни, додавајќи дека оштетените заслужуваат правично расчистување на случајот, но не по цена на неправда кон обвинетите.
„Обвинението што го добивме е документ кој тешко може да се нарече правно валиден. Со жалење морам да кажам дека ваква правна неконзистентност не сум сретнал. Нашата цел е јасна – праведност за оштетените, но и за секој поединец кој неоправдано е ставен на обвинителната клупа“, рече Шилегов.
Според обвинението, на Шефкет Хазари клинетот на Шилегов му се става на товар дека бил свесен за можните штетни последици и се согласил со нивно настанување. Обвинителството се повикува на членови 288 и 292 од Кривичниот законик.
Шилегов оцени дека обвинението содржи хронолошки апсурди, нагласувајќи дека органите за прогон треба да објаснат како е можно Хазари, во периодот 2013–2019, да се согласил со настан што се случил во март 2025 година.