Нема да има толеранција за ниеден концесионер, кој не ги почитува законските прописи за обележување и обезбедување на плажите, истакна градоначалникот на општина Струга Зијадин Села.
Тоа што е пропишано со закон и правилници, нагласи дека треба да се почитува и оти општината постојано прави контроли и презема мерки.
Според струшкиот градоначалник, имало случаи каде е наведено дека плажите се само за гости од хотелот.
– Не може така да се однесуваат со јавни површини, кои се богатство на граѓаните на Струга. Реагираме и ги спречувавме таквите појави, а ќе ги спречуваме и во иднина, рече Села.
Проблемот со плажите во Струга, како што нагласи, е наследен, бидејќи Министерството за транспорт ги даде под концесија, а времените објекти не влегуваат во генералниот урбанистички план.
– Министерството можеше да дава концесии, но за времените објекти требаше дозвола од општината. Тоа не е направено тогаш и сите тие објекти се диви. Јас ќе постапам и сите тие објекти ќе бидат тргнати. Само чекам, бидејќи некои имаат, а некои немаат документи. За мене сите се на исто ниво, сите го кршат законот, бидејќи со генералниот план на плажи не е дозволено поставување шанкови и објекти од тврда градба, туку дозволено е само поставување помошни објекти, како чадори, лежалки, спортски реквизити… Нормално дека ова треба да се почитува и планот ми е да ги вратам градските плажи на граѓаните, подвлече Села.