Секој ден по три часа средношколците ќе можат да пливаат во базен во Спортскиот центар „Борис Трајковски“, каде се вклучени 10 тренери и инструктори – волонтери од Факултетот за физичка култура во Скопје, како и спасители од Црвениот крст.
Ова е дел од проектот „Пливање“ на Владата, Министерството за образование и наука, Бирото за развој на образованието и Градот Скопје.
Директорката на Бирото за развој на образованието Весна Хорватовиќ истакна дека 7.000 ученици од Скопје, кои се прва година во средните училишта, во текот на цела оваа година ќе реализираат настава по спорт и спортски активности, односно пливање во овој базен.
– Има огромен процент на ученици кои не знаат да пливаат и оти со овој проект ќе се овозможи сите да научат да пливаат. Цениме дека ова е многу корисен проект затоа што првпат учениците од сите средни училишта ќе можат практично да реализираат настава по пливање – додаде таа.