Во Собранието на Република Македонија денеска седници ќе одржат комисиите за политички систем и односи меѓу заедниците, за здравство и за транспорт, врски и екологија.
На дневен ред на Комисијата за политички систем и односи меѓу заедниците се измените и дополнувањата на Кривичниот законик, како и на законите за извршување и за јавното обвинителство, поднесени од група пратеници од ВМРО-ДПМНЕ, сите во прво читање. Комисијата ќе расправа и по Годишниот извештај за работата на Советот на јавните обвинители на Република Македонија за 2016 година.
Членовите на собраниската Комисија за здравство ќе го разгледаат Предлог-законот за докторска дејност во прво читање, поднесен од група пратеници од ВМРО-ДПМНЕ.
Комисијата за транспорт, врски и екологија ќе расправа по Годишниот извештај за реализација на годишната програма за работа и развој на Агенцијата за цивилно воздухопловство за 2016 година и по измените на Законот за aудио и аудиовизуелни медиумски услуги во прво читање, поднесен од група пратеници од ВМРО-ДПМНЕ.
