Во Собранието на Република Македонија денеска ќе заседаваат комисиите за политички систем и односи меѓу заедниците и за транспорт, врски и екологија, како и Законодавно-правната комисија.
Седница ќе одржи и Буџетскиот совет на Собранието на чиј дневен ред е Предлог-заклучокот за утврдување на бројот на надворешни соработници во Пратеничката група на СДСМ, НСДП, ЛДП И ПДТ согласно Законот за Собранието на Република Македонија.
Пред Комисијата за политички систем се Годишниот извештај за работата на Државниот совет за превенција на детско престапништво и за состојбите во областа на правата на детето и малолетничкото престапништво во 2014 година, предлог-измените и дополнувањата на законите за управна инспекција и за архивски материјал, како и предлог-дополнувањата на Законот за постапување по претставки и предлози, сите во второ читање, додека Комисијата за транспорт ќе го разгледа Предлог-законот за изменување и дополнување на Законот за управување со отпадот во второ читање..
Законодавно-правната комисија ќе расправа по предлог-законите за изменување и дополнување на законите за управување со отпадот, за архивски материјал и за управна инспекција, предлог-дополнувањата на Законот за постапување по претставки и предлози, како и по Предлог- законот за прогласување на Старото градско јадро на Битола за културно наследство од особено значење, сите во второ читање.
